Salmenta hauek Nafarroan merkataritza arautzen duen ekainaren 12ko 17/2001 Legearen seigarren tituluan jasotzen dira eta, Titulu honetan arautzen ez denetan, Txikizkako merkataritza arautzen duen 7/1996 Legeko III. Tituluari jarraituko zaio, honen osagarri baita.

Urrutiko salmenta, herriz herrikoa, automatikoa eta enkante publikokoa joko dira salmenta berezitzat..

Salmenta horiek aldez aurreko baimena beharko dute, Industri eta Teknologia, Merkataritza, Turismo eta Lan Departamentuak emana, eta halakoetan aritzen diren merkatariek izena emanda izan beharko dute Nafarroako Foru Komunitateko salmenta berezien txikizkako merkatarien erregistroan.

Departamentuari aurkeztuko zaion eskabidean ondoko alderdiak egiaztatu beharko dira:

• Enpresaburuaren identifikazioa, eta halakorik egina badu, merkataritzako erregistroko inskripzioa eta identifikazio fiskala.



• Garatuko den jarduerari buruzko txostena, eskaintzen dituen zerbitzu eta produktuen zerrenda, jarduteko eremua eta saltokiak Nafarroan.



• Tributu-betebeharrak eta Gizarte Segurantzakoak egunean dituela adierazten duen ziurtagiria.



• Jarduera Ekonomikoen gaineko Zergen kasuan kasuko epigrafean alta emanda dagoela eta haren ordainketan egunean dagoela adierazten duen ziurtagiria.



• Produktu zein zerbitzu bakoitzerako ezarritako baldintzak betetzea eta salmenta mota bakoitza egin ahal izateko exijitzen diren baimen osagarriak edukitzea.



• Enkante publikoko salmenta egiten bada, jabe eta lizitatzaileekiko harremanetan enkantea egiten duen enpresak ezartzen dituen baldintza orokorrak.

Eskaera erregistroan sartu edo eskatutako dokumentazioa osatu, eta handik hilabeteko epean esanbidezko ebazpena ematen ez bada, baimena eman dela ulertuko da. Eskatu den baimena soilik ukatu ahalko da baldin eta arestian azaldutako baldintzetako bat egiaztatzen ez bada.

Baimena ezeztatu ahalko da baldin eta enpresaren jarduera eteten bada edo horretarako baldintzak betetzen ez badira. Salmenta berezietan aritzeko baimena duten merkatariek baimen eskaeran emandako datuei buruzko aldaketa oro jakinarazi beharko diote administrazioari.

Salmenta berezietako baimenak zein haien gaineko aldaketak eta ezeztatzeak administrazioak berak erregistratuko ditu Nafarroako Foru Komunitateko salmenta berezien txikizkako merkatarien erregistroan. Baimena erregistratzean ondoko datuak jasoko dira: enpresaren identifikazioa, salmenta mota, merkataritzako eskaintza osatzen duten produktu eta zerbitzuak, jarduteko eremua eta kontsumitzaileek erreklamazioak aurkezteko tokia.

Merkatariek baimenaren kopia bat izan beharko dute kontsumitzaileen eskura, eta erakutsi egin beharko dute baldin eta salmenta egiten bada bi parteak aldi berean bertan daudela.