2.5.7. Arau-hausteak

Turismoaren alorreko arau-hauste administratiboak Turismoari buruzko otsailaren 14ko 7/2003 Foru Legean tipifikatzen diren egite edo ez-egiteak dira.

Turismoaren alorreko arau-hauste administratiboak arinak, larriak eta oso larriak izan daitezke.

Foru lege honetan aipatzen diren arau-hausteak honelaxe preskribituko dira: oso larriak hiru urtera, larriak bi urtera eta arinak sei hilabetera. Arau-hausteak preskribitzeko epea araua hausten den egunetik zenbatzen hasiko da.

Etengabeko jarduera baten ondoriozko arau-hausteetan, preskribitzeko epea jarduera arau-hauslea bukatzen den egunean hasiko da, edo, bestela, araua hausten duen azkeneko egintza egiten denean.

Preskripzioa eten eginen da, behin interesdunari jakinarazita zehapen espedientea irekitzen denean.

• Arau-hauste arinak
  
  Hona hemen arau-hauste arinak:
  
  
  • Kontrataturiko zerbitzuak haien izaeraren eta hitzarturiko baldintza eta zehaztapenen arabera ez egitea.
  
  
  • Establezimendu turistikoetako lokal, instalazio, altzari eta tresnen aurkezpen eta funtzionamendu baldintzetan akatsak izatea.
  
  
  • Erabiltzaileak ongi ez tratatzea.
  
  
  • Bezeroari prezioaren parte bat ezkutatzea, eskatu ez dituen edo adierazi ez diren prestazioak emanez.
  
  
  • Kontratatu ez diren zerbitzu edo ondasunak erabili edo kontsumitzera behartzea, edo eskaini ez diren baldintzetan.
  
  
  • Turismoaren alorrean eskudun den administrazioari establezimenduaren titulartasunaren aldaketak edo turismoari buruzko arautegiak eskatzen dituen argibideak ez jakinaraztea.
  
  
  • Enpresa, instalazio edo zerbitzuaren araubide eta funtzionamendu egokirako eta erabiltzailea babesteko berme gisa ezarritako kontratu, agiri, faktura, argibide edo erregistroei buruzko arauak, nahitaez bete beharrekoak, ez betetzea.
  
  
  • Kontratua bukatutzat emateko edo egin beharreko zerbitzuak bertan behera uzteko arauak ez betetzea.
  
  
  • Erreklamazio orririk ez edukitzea edo eduki bai baina eskatuz gero horrelakorik ez ematea.
  
  
  • Turismo enpresarekiko harremanaren baldintzak frogatzen dituzten agiri guztiak eta, betiere, legez eginiko fakturak, bezeroari ez ematea.
  
  
  • Erregelamendu bidez ezarritako establezimenduetan nahitaez erakutsi beharreko bereizgarriak ez edukitzea edo, erakutsita ere, eskaturiko betebeharrak haiek ez betetzea.
  
  
  • Produktu eta zerbitzuei eta haien prezioei buruzko publizitatea arautzen duten xedapenak ez betetzea.
  
  
  • Zerbitzu batzuk arautu ditzaketen agindu berezien publizitaterik eza.
  
  
  • Establezimenduaren egitura, tamaina edo ezaugarriak administrazioari jakinarazi gabe aldatzea, jakinaraztea beharrezkoa denean.
  
  
  • Kanpaleku turistikoetan kanpaleku unitatearenak ez diren osagaiak jarraian paratu edo kokatzeko baimena ematea.
  
  
  • Oro har, turismoari buruzko arautegian ezarririko baldintza, betebehar eta debekuak ez betetzea, baldin eta larriak edo oso larriak ez badira.


• Arau-hauste larriak
  
  Hona hemen arau-hauste larriak:
  
  
  • Legez gaiturik ez dagoen norbaitek zerbitzu edo jarduera turistikoak egin edo ematea.
  
  
  • Jarduera turistiko bat sailkatu edo bertan jardun ahal izateko inskripzio, titulu, lizentzia, jakinarazpen edo nahitaezko gaikuntzarako betebehar edo baldintzak ez betetzea edo aldatzea.
  
  
  • Sailkapenaren arabera dagozkion izen, errotulu edo bereizgarrien ordez beste batzuk erabiltzea.
  
  
  • Kontratuaren xede den zerbitzuren bat ez ematea edo itundutako kalitate, kantitate edo izaerako baldintzak ez betetzea.
  
  
  • Bezeroei askatasunez sartzen ez uztea edo haiek kanporatzea, justifikaziorik gabe.
  
  
  • Zerbitzuak publizitatean agertzen direnak baino prezio garestiagoetan ematea edo prezioei buruz indarra duten xedapenak bete gabe.
  
  
  • Turismo ikuskapenari edo administrazioko beste organo eskudun batzuei uko egin edo eragozpenak jartzea.
  
  
  • Jarduera turistikoen subjektuek eskaintzen dituzten zerbitzuen funtsezko osagaiei buruz engainua edo nahasmena sortzen ahal duen publizitatea.
  
  
  • Zerbitzua postu erreserbaren arabera ez ematea, dauden postuak baino gehiago kontratatzeagatik.
  
  
  • Azpiegitura edo funtzionamenduko akatsak zuzentzeko turismo administrazioak emaniko epeak ez betetzea, horretarako justifikaziorik gabe.
  
  
  • Turismoari buruzko arautegiak eskatzen dituen aseguruen eta fidantzen bermeen zenbatekoa gaurkoturik ez edukitzea.
  
  
  • Kanpaleku turistikoetan kanpinlari egoiliarrak onartzea eta debeku diren kanpaleku-unitateak paratzea.
  
  
  • Kanpinlari egoiliarrak dira kanpaleku turistikoan ohiko bizilekua dutenak.
  
  
  • Zerbitzu turistikoak emateko legez gaitu gabeko bulego, lokal, ibilgailu edo pertsonak erabiltzea edo gaiturik egonda ere jadanik erabiltzeko moduan ez daudenak erabiltzea.
  
  
  • Zuzenak ez diren argibideak ematea edo agiri faltsuak aurkeztea.
  
  
  • Arau-hauste arinetan berrerortzea.
  
  
  Artikulu honi dagokionez, berrerortzea da urtebetean izaera bereko arau-hauste bi edo gehiago egitea, bide administratiboan ebazpen irmoaren bidez halaxe adierazi denean.


• Arau-hauste oso larriak
  
  Hona hemen arau-hauste oso larriak:
  
  
  • Turismoari buruzko arautegia haustea, Nafarroaren interes turistikoei, kasuan kasuko lanbide edo jarduera turistikoaren prestigioari edo orokorrean bezeroei kalte larria egiten badie.
  
  
  • Erabiltzaileak bereizkeriaz tratatzea, baldin eta arraza, sorterri, sexu, erlijio, iritzi edo norberaren edo giza-taldearen beste edozein inguruabarrengatik egiten bada.
  
  
  • Turismo establezimendu bat ireki edo jarduera turistikoan aritzeko titulu, lizentzia edo nahitaezko gaikuntza inskribatu edo emateko funtsezko kontuak doluz aldatzea.
  
  
  • Arau-hauste larrietan berrerortzea.
  
  
  Artikulu honi dagokionez, berrerortzea da urtebetean izaera bereko arau-hauste bi edo gehiago egitea, bide administratiboan ebazpen irmoaren bidez halaxe adierazi denean.